HVB Kinderfemiliebal 2019

Weej kièke efkes truuk, want op zaoterdaag 23 fibberwarie waort in ein moeij versierde kantine ‘t jaorlikse Kinderfemiliebal gehalde. Idderein stónd d’r weer moeij verkleid op en waas klaor um d’r ‘nne leuken aovend van te make.

‘t Oètroope van ‘t nieje prinselik duo stónd al vruug op ‘t programma.

Spraekstalmeister Bas vroog Prins Bas van ’t veurig jaor en Prinses Zoë van 2 jaor truuk op de bühn. (Prinses Eefke waas neet in de gelaegenheid um te kómme) Vaerder vroog hae nog 8 minse de bühn op en waort aan de hand van 10 vraoge ’t nieje duo van 2019 bekind gemak.

Prins Chris I en Prinses Jill II regaere dit jaor euver ós handbalrièk!!

Prins Chris (Vaessen) is 12 jaor, speult beej de jónges D1 en aaf en toe beej de jónges C1. Hae zit op ’t Blariacumcollege in Bliërick. Prinses Jill (Staaks) is ouk 12 jaor, speult beej de maedjes D2 en zit op de Titus Brandsma in Bliërick.

Drek nao ’t oètroope waort de proklemasie veurgelaeze en stónd ’t ièrste gezelschap al klaor um ós duo te fillecitere. ’t Jeuggezelschap van de Worteleschrabbers met Prinses Guusje en eur adjudante Fee (adjudante Iva waas krank) kwame gaer ein kedootje bringe, want Prins Chris is ouk lid van de Raod van 11 van de Worteleschrabbers. De bühn waort metein ingezaegend met duchtig hosse en springe.

Netuurlik had de organisatie gezörg veur ein paar optraejes. Lisanne en Marieke zónge 2 leedjes en ouk Onno, Graad en Paul zónge eur nr. 1 hit: “Eine moeije mins”. Op ’t leedje “o ya lele” van K3 waort gedans door Katja en Robin van Dames 1 en ‘n paar maedjes van de E-jeug. Met ein hoèsorde en ein kedootje waorte zeej vrintelik bedank door Prins Chris en Prinses Jill.

Op zó’n geweldig fees kós de Bliërickse Wortelepin neet óntbraeke. Ièrs kwaam Prins Roy I met zién adjudante Dennis en Ronald op de bühn. Wal kwant um te huure det Prins Roy in ein griès verleeje ouk met ’t belke in de hand haet gespeuld.

Maar ’t wachte waas netuurlik op ós Prinses Gwen met eure Prins Jaimy van ’t jeuggezelschap van de Wortelepin. Dit jaor weer einen hoëgheid oèt ózzen handbalvièver, want Prinses Gwen speult in de maedjes D2 van HVB. As of det nog neet genóg is, hebbe zeej ouk 3 HVB-leeje in eure Raod van 11 staon: Chloë van Thulden, Isa Saris en Jeroen Hendriks.

Piet kwaam ouk nog efkes de bühn op, um de verkoupers van de meiste luuëtjes van de groëte clubaksie in ’t zunke te zette. Ein bedraag van € 991,10 is met deze aksie opgehaold.

As letste kwame de Giebelvötjes (Dames Recreante van HVB) ós duo ein kedootje bringe.

Nao ‘t offisjeele gedeilte waort d’r duchtig gedans en gesprónge op de bühn.

‘t Fees ging nog door tot in de kleine äörkes.