Opgaeve Optoch 2019 “Laef d’n daag!
Ut is nog wiéd weg, maar de Optochkemissie van HVB is alweer drök bezig met de veurbereidinge van de vastelaovend 2019!Ut Bestuur en de Optochkemissie wille de deilname aan de Bliërickse vastelaovend ‘nne positieve ‘boost’ gaon gaeve um as schitterende groéte groep mei te loupe in de Bliërckse optoch en daormei as HVB ziende ‘n visitekaertje aaf te gaeve!Nao aafgelaupe optoch is Arianne Trienekens nao vuule jaore van trouwe deens gestop as lid van de Optochkemissie. Beej deze asnog ózze hertelikke dank veur ziene inzet al dae tiéd!As opvolger heejveur hebbe weej emand van boéte de vereiniging bereid gevónde de take van Arianne euver te neme: patroéne óntwerpe, stóf inkoupe, maete en knippe.Vaerder is d’r eine nieje wage geregeld dae veurop in de optoch geit. Ouk zien we nog aan ut bekiéke um dao eventueel ein ker veur de kinder achter te hange. Tot slot beschikke we euver ein andere muziekinstallasie en is ein nieje “knutsel”-lokasie beschikbaar.Geej zeet: d’r is neet stil gezaete en d’r is al vuul (veur)werk gedaon … wat HVB haopelik allein maar weer ‘nne prachtige, schoéne optoch geit oplevere!Dit held wal in det d’r organisatorisch en ouk qua planning ein en ander geit verandere:
- tot uuterlik 31 mei kin ut inschriefformulier waere ingeleverd
- in juni waere d’r ein of mierdere maetaovende georganiseerd
- veur de zomervekansie wuurt ut stóf gekoch
- in de zomervekansie waere de pakke geknip
- in augustus zien ’n damespak en ’n hierepak as veurbeeld beschikbaar
- in september wuurt ut stóf oétgereik
Ten opzichte van veurig jaor zal d’r €5,00 mier gevraog gaon waere per deilnemer.Vaerder zien weej nog op zeuk naor vreejwilligers die de Optochkemissie ‘n hendje wille helpe of óndersteune. Dit kint geej kinbaar make op ut inschriefformulier. Weej haope det d’r zich weer minstes net zoé vuul deilnemers as aafgeloupe jaor inschriéve!